Pathian in lei leh van a siam a, a chhunga thil awm zawng zawngte nen. Tunlai finna a mihringin a la chhuichhuah zawh loh tam tak leh a chhui phak loh, chhiarsen lohte han ngaihtuah chuan Pathian thil tihtheih nasat zia hi tuin nge hrilhfiah zovang.
Mihring chi te lutuk tak mai a, kan pa leh kan nute kan chhunna tur hmelhmangte, zeiziate, sanzawngte, aw phawi zawng zawngte han thun hi chu tlang lianpui han din tawp ai chuan hun a duh rei deuh in bih ngun deuh a ngaih kan ring deuh ngawt a. Mahse kan Pathian hian a duangsual lo reng reng mai. Boruak kan hip luh chhung a chakna awm pawh hi kan mamawh zat chiah chiah a lo ni e. Mahse kan thupui khian Engkimtithei loah a chhuah tlat mai si a.
Sual a lo pianchhuah takah khan, sual chu hlimnate, thlamuannate, rinawmnate, hmangaihnate, diknate leh felnate hmelma a lo nih tak siah chuan Van khawpui pawh chu sual avang chuan a him ta bik lo va. Sual chu a zung chawpa halral a lo ngai ta a. Chu Sualna huatthlala em em mai, he khawvel pawh tichhia a mihring nunna hlu tak pawh suat reng mai tu chu a zung nen a phoro vek a, sual reng reng awm lo Van thar leh lei thar din a lo tul ta a ni.
Ama anpui a A siam, A hmangaih em em, Mihringte sual kan lo kai ve tak si ah chuan halral leh phoro, sual boral rual a boral ve tur
kan lo ni ta. Phar ang mai a, khaw pum ti ralkhel a ti ralti leh tibawlhhlawhtu mai kan lo ni ta.
Chu sual halralna a Mihringte kan tel ve loh nan a kawng awmchhun Kalvari tlangah chuan Pathian thil tihtheih loh zia a lo lang ta tlat mai. A fapa duatlai a thiamlohna pawh ni miah lovah Rome sipaiin an han man a. Dim baksak lovin an han nghaisa a, a ma mite lah chuan chhan a hnekin dawtin an la hek zui. Kei chu Pathian chu ni ila, “A tawk e!!!” tih pahin ka kawh thluk tawp tawp mai ka ring. Pathian pawhin a thei lo bik a ni hlei nem, A fapa hi a lainat lo pawh a ni chuang lo, a nihna takah chuan a en ngam lo mai chauh a ni.
“ Pathian fapa ka ni I ti a ni lawm ni, Kraws atang kan lo chhuk thla la in ti dam ta che, chutichuan kan ring ang che ”. Theih chu a thei ngei mai mawle. Power han pe se a kilhna perek kha silaimu ang mai in a per chhuak vawn vawn mai dawn a ni si a. A hliam zawng zawng te kha a phui leh tuam tuam ngei awm si a. He mite Pafa hi vawin zet zawng vuak pherh an tuar a nih hi le. Engkim siamtu meuh tukdawl a an awm ta mai chu, a va rapthlak em.
Kan Pathian hi Hmangaihna a tuiral, mahni pawh in chhanchhuak zo lo hmangaih Pathian a lo ni e.
