NUAM CHEM CHEM

Zing kan harh a, ka tukverh a zingni chhuaklo lang chu a no mawi nghulh nghulh hle mai. Kawmthlanga thingzar a sava hram chiap chiap te chuan lung an ti leng reuh hle mai. Vawin chu hnampa Gandhi a piancham a ni a, sorkarin chawlhah a puang bawk a thawh hma vak a ngaih loh hi ti rilru chung chuan ka zi kual vel a. Chhing mit meng reng chung a ka zal lai chuan ka lung in a pump chhoh thisen ka thluak a lut chuan ka lairilah ngaihtuahna fahrah te te a rawn siam vel a. Chutia, suangtuahna lipuia ka hleuh vel lai chuan kan kohhran nawm zia te ka ngaihtuah vel a, a nawm leh zual dan tur te kan hisap kual vel a.

            Vawin chu engnge ka tih ang aw? Chawlh manah ka duh duh, nuam ka tih zawng zawng ka ti thei a, ka free a ni “ I’m a free boy, today…ha ha ha”.

Duh thlan tur list te:

1). TV en a thutthlengseia mut nilen.

2). Ka thianpa ka va sawm anga kan leng mai mai zawk dawn a maw ni le?

3). Games te khel mai mai I la a ni mai.
4). Ka phur thut leh Pi Kungi dawrah ka va thu ve  mai mai thei reng,

            Heng ka nuam tih zawng ah hian sum sen vak a ngai lo, ngaihtuahna pawh a ngai vak lo.   

Chutia duh thlanga ka buai lai chuan, Vantirhkoh Gabriela ni mai awm tak hian ka in hualhimna blanket chu a rawn phih thla thawt hian ka hria a. Kan en chiang chu kan uipa Buanga a lo ni reng a.

            Thil nuam leh awlsam um kual um kual vel hi ka zia nghet a lo nih dawn hi. Thil tha ni mahse ka tui zawng leh chak zawng ( nuam ka tih zawng ) a nih loh chuan ka ngaisang lo mai zel. Ka thawh hah rah pawh ni vak em em lo, nuam a ka rin te hi lo nuam mahse rilru ah thlamuanna leh hlimna an thlen tam lo thin hle. Midang in an buatsaih sa emaw, an tihsa nuam awm tak ka va um a, ka va chen ai chuan, a tir a nuam a lang lo leh hahthlak deuh pawh nise thil tha ka hma a lo tla ka tih hlawhtlin tang tang avang a lo rah chhuak, ka thawh rah leh ka kutkawih ngei mai chuan ka tan thlamuang taka hlimna a keng tel bik tlats.

            Hlimna thuruk chu hei ngei hi a lo ni:- Pathianin min pek ka theihna hmanga ka hma a thil tha ka tlansan loh a, thahnem ngai taka ka tihhlawhtlin hian. He taimate hlawhtlinna thuruk hi kan ui Buanga vanga ka thinlung a lo in thailang ni mahse Gabriela thusawi tluk in a hlu in ka hria. Ka tlangval that lai a dawng kha chu ni I la, tun ang hian mi company hnuaiah hlawh tlem te kham tham loh tak hlawh hian ka phi ka phi awm si lo va. Nupui fanau chawmna tlak pawh nilo bak hi kan hmu zo si lo, ka thatchhiat rah ka seng der der a nih ber hi. Gandhi a birthday pawh hi nuam ka ti hrep lo ve.