Editorial

Hman deuh khan zawhna ka dawng hlawl mai a! Engvangin nge School/College leh hnathawhna ah thalaite hi kan tlai ngai mang si lova, Inkhawmna ah kan tlai kher thin le! Tiin min zawt hlawl mai a, chhan dan mai tur ka van hle a ni. Chuta tang chuan ka rilru ah a cham reng mai a, insiam that kan mamawh anih loh pawhin inen let tal chu kan mamawh anih a rinawm hle.

Thiante/thawhpuite mitmei kan ven vangten kan kal hma fo thin a, teacher te kan hlauh vangte pawhin kan kal tlai ngamlo thin! Amaherawhchu chung aia ropui zawk Lei leh van leh a chhunga awm zawng zawngte Siamtu kan Biakna hmun ah hian ngatinge kan kal tlai fo mai thin chu le!

Kan nitin nunphungah tlai kan hlau thin a, theih tawpin tlai lo turin kan bei hram hram thin a ni si a. Thalaite u! Khawvel thil ah mah tlai kan hlauh si chuan Siamtu biakna hmun ah hian tlai loh i tum ang u khai. Kohhranten sik leh sa milin tan hun an ruat ah hian tlailo turin i ngai pawimawh ang u. Thalai kan nih lai atanga kan tlai reng mai chuan kan hlawhtling thei ngai lovang tih i hre thar ang u.