HRINGNUN : ~Mary Kay Ash

Mihringah hian chi li kan awm a: pakhatnaah chuan thil engemaw thlen tirtu; chung thil thleng lo thlir liam mai tute; tin, thil thleng lo ngaihtuah tute leh thil thleng engmah hre ve ngailotute kan awm a, ka naupan tet atangin a hmasa ber ang nih khi ka duh ber thin a ni.

            Chiang tak maia ka hriat chu mi hlawhtling tak tak te hi an mahni mimal nuna thil bet, tumna te leh an theihna vangte a ni chawk. Mahse chungte chu an mahni ah a awm nghal mai bik lo a, thil tum an nei a, inthununna leh tumruhna te nei turin midangte thurawn an ngaichang a, tichuan an hnaah a takin an chantir a, an nuna bet tlat turin leh hlawhtlinna nei ngei turin an thawk a, a tawpah mi hlawhtling tih an lo hlawh ta thin a ni.

            Kei pawhin he zirlai hi zir ve niin ka inhria a. kum 7 mi ka nih laiin ka pa hian khuh benvawn natna a vei hlauh mai a, kum thum chhung inenkawl tur leh chawl hahdam turin an ti a, mahse dam lam a pan thei der lo mai. Chutih lai chuan ka school ban veleh in ka tifai a, ka homework te ka ti leh a, lungawi takin ka hna chu ka thawk mial mial zel a ni. A chang chuan ka hna chu naupang tihah chuan phurrit tak tak mai te an ni a, ka nu hian tih dan tur min hrilh a, a thusawi zinga a telh ziah chu ‘Bawihte, I ti thei a ni’ tih hi a ni.

            Thil lungchhiatthlak deuh chu mi tam takin an thil rimawi zirlai ti peih lovin tui lairapin an awm a, tih chhunzawm tumna an nei der lo. Engatinge? A chhan chu mahni inrintawkna an tlakchham vang a ni. Abik takin hmeichhia te phei hi chuan kan hlutna hi atam ang hu in kan hmang chhuak thiam lo fo thin.

            Hmeichhia te hian lan mawi hi kan duh ber leh kan tum ber a ni a, chutiang i duh chuan thurawn ka pe ang che- hlau suh la tap hek suh, hnual suh la i lu zo takin inring tawk takin awm ang che. Chutiang bawkin hmeichhia te hi sumdawnna lamah hlawhtling thei lo kan ni bik lo. Kan mamawh chu hriatna, thil thlir thiamna, kan hmuia hnawih tur kan thlan thiam dan ang bawka thutlukna neih thiam a ni mai. Keimahnia zahawmna te, duhawmna te, ngaihtuahna fim tak kan neih te, rinawmna te hi Pathian in min siam dan, a kut chhuak kan ni a, chuvang chuan kan hlutna hi hriain i hmang tangkai ang u.

Mary Kay Ash-i hi tunlaia hmeichhia tena kan hman powder leh rimtui (cosmetic), Mary Kay Company dintu leh chairman nilai mek a ni.